ملزم رمیش اپادھیا ئے کی غیر موجودگی کی وجہ سے سماعت ملتوی عدالت نے استغاثہ کو عدالت میں مزید گواہان کو پیش کرنے کا حکم دیا ممبئی9 دسمبر مال...
عدالت نے استغاثہ کو عدالت میں مزید گواہان کو پیش کرنے کا حکم دیا
ممبئی9 دسمبر
مالیگاؤں 2008 بم دھماکہ معاملہ میں آج یہاں خصوصی این آئی اے جج نے ملزم میجر رمیش اپادھیائے کی غیر موجودگی کے باعث سماعت ملتوی کردی حالانکہ آج عدالت میں گواہی دینے کے لیئے ایک گواہ موجود تھا جو ملزم کے قبضہ سے لیپ ٹاپ ضبط کرتے وقت بطور پنچ موجود تھا۔
وکیل استغاثہ اویناس رسال نے عدالت کو بتایا کہ عدالت میں موجود سرکاری گواہ کی گواہی کے وقت ملزم کا عدالت میں موجود رہنا ضروری ہے جس کے بعد خصوصی این آئی اے جج پی آر سٹرے نے ملزم میجررمیش اپادھیائے کا دفاع کرنے والے ایڈوکیٹ سدیپ پاسبولا کو حکم دیا کہ وہ 19 دسمبر کو ملزم کو عدالت میں حاضر رہنے کے لیئے کہے اور سرکاری گواہ کو بھی حکم دیا وہ 19 دسمبر کو صبح 11 بجے عدالت میں حاضر رہے۔
اسی درمیان خصوصی جج نے سرکاری وکیل کو حکم دیا کہ وہ عدالت میں کل کسی دوسرے گواہ کو پیش کرے۔
عیاں رہے کہ ملزم میجررمیش اپادھیائے نے ضمانت ملنے کے بعد اے ٹی ایس کی جانب سے ضبط کئے گئے لیپ ٹاپ کو عدالت کی اجازت سے حاصل کیا تھا جس کے متعلق گواہی دینے کے لیئے آج پنچ گواہ کو عدالت میں طلب کیا گیا تھا لیکن ملزم کی عدم موجودگی کی وجہ سے سماعت ملتوی ہوگئی۔
آج عدالت میں سادھوی پرگیہ سنگھ ٹھاکر کی غیر موجودگی میں اس کے وکلاء جے پی مشراء اورپرشانت مگو موجود تھے جبکہ ملزمین کرنل پروہت، سمیر کلکرنی بھی موجود تھے۔ بم دھماکہ متاثرین کی جانب سے ایڈوکیٹ شاہد ندیم(جمعیۃ علماء مہاراشٹر ارشد مدنی) موجود تھے۔
ممبئی کی خصوصی این آئی اے عدالت ملزمین سادھوی پرگیہ سنگھ ٹھاکر، میجررمیش اپادھیائے، سمیر کلکرنی، اجئے راہیکر، کرنل پرساد پروہت، سدھاکر دھر دویدی اور سدھاکر چترویدی کے خلاف قائم مقدمہ میں گواہوں کے بیانات کا اندراج کررہی ہے، ابتک 140 گواہوں کی گواہی عمل میں ا ٓچکی ہے اور عدالتی کارروائی روز بہ روز کی بنیاد پر جاری ہے۔
